Home / eBooks / Ammavin Nizhal
Ammavin Nizhal eBook Online

Ammavin Nizhal (அம்மாவின் நிழல்)

About Ammavin Nizhal :

இருக்கிற இருப்பில் நடக்கிற நடப்பில் இலக்கியம் பற்றிச் சிந்திக்கவும் எழுதவும் படைப்பாளன் தன்னைத் தயார் படுத்திக்கொள்ள வேண்டியிருக்கிறது. அல்லது அத்தகைய நெருக்கடிக்கு அவன் ஆளாவது என்பது தவிர்க்க இயலாததாகும்.

சமூக அமைப்பில் அன்றாடம் எத்தனையோ பிரச்சினைகள், கீழிருந்து மேல்மட்டம் வரை ஒவ்வொருவருக்கும் நேர்கிறது. அது படைப்பாளனை நோக்கியும் முட்டி மோதுகிறது. அவற்றிலிருந்து மனிதன் விடுவித்துக் கொண்டு மீளுவது என்பது மிகப் பெரிய சாதூர்யமான காரியம் தான்.

அத்தனையிலும் பங்கு பெறுகிற படைப்பாளன் தன்முன் நடக்கும் அனைத்துச் சம்பவங்களோடு, தானும் ஓர் அங்கமாகி நிற்பதோடு போராட்டக்களமாக வாழ்க்கையைக் கட்டமைத்துக் கொண்டிருக்கிற இச்சமூக அமைப்பு குறித்து ஒரு பார்வையை முன்வைக்க வேண்டியது அவசியமாகிறது.

கலைஞனின் பணி என்பது ஏதோ ஒரு நிகழ்வைப் பதிவாக்கிவிட்டு மட்டும் தப்பித்துப் போய்விட முடியாது. அவற்றுக்கப்பாலும் மனிதகுலம் என்பது சந்திக்க வேண்டிய அல்லது அன்றாடம் சந்தித்துக் கொண்டிருக்கிற பிரச்சினைகளுக்குப் பதில் சொல்லக் கடமைப்பட்டவனாக கலைஞன் இருக்கிறான். அவனுக்குள்ள சமூகப் பொறுப்பு என்பது அளவிடற்கரியது. ஒரு சரியான திசைவழிக்கு அவனால் அழைத்துச் செல்லப்படவேண்டும்.

சமூகத்தளத்தில், குறிப்பானதொரு தாக்கத்தையும் விளைவையும் ஏற்படுத்தும் படைப்புக்கள் தாம் இலக்கிய வரலாற்றில் தொடர்ந்து நிலைத்து நிற்கக் கூடியவையாக இருக்கின்றன. அத்தகைய படைப்புக்களை நோக்கியும், உலகில் பிற தேசிய இனங்களில் தோன்றியுள்ள மற்ற இலக்கியத் தன்மையோடும் அதன் வளர்ச்சியோடும் ஒத்துப் போகிற படைப்பாக்கங்கள் நம் மொழியில் தொடர்வது என்பது தவிர்க்க இயலாத ஒன்றாகிறது.

இத்தகைய இனிய இலக்கியச் சூழலில் என்னையும் அர்ப்பணித்துக்கொண்டு தொடர்வது தான் எனது இலக்கியப்பயணம். இது குறுகிய பயணமோ, குறுக்குவழிப் பயணமோ அல்ல;

நீண்ட பயணம்!

இந்த நீண்ட பயணத்தின், இடையில் நான் இலக்கியத்தின் இலக்கினை எட்டியிருக்கலாம்; இல்லாமலும் இருக்கலாம்; என்றாலும் எனது பணி தொடர்கிறது; பயணமும் தொடர்கிறது.

இந்த நீண்ட நெடிய பயணத்தில் பலரும் என்னோடு வந்து போயிருக்கிறார்கள். தொடர்ந்து என்னை அரவணைத்தும் கைபிடித்தும் வந்து கொண்டிருக்கிறார்கள் - தோழர்கள், விமர்சகர்கள், வாசகர்கள், பத்திரிக்கைகள், இதழ்கள்... என.

இத்தொகுப்பைச் சிறப்பாக வெளியிட அனைவருக்கும் எனது நன்றிகள்.

- விழி. பா. இதயவேந்தன்

About Vizhi Pa. Idhayaventhan :

விழி பா. இதயவேந்தன் அவர்கள் சிறுகதை, கவிதை, கட்டுரை, குறுநாவல், வீதிநாடகம் என்று பன்முகம் கொண்ட எழுத்தாளர். இவரின் படைப்புகள் ஐம்பதுக்கும் மேற்ப்பட்ட இதழ்களில் வெளி வந்துள்ளது. இந்தியா டுடே, கணையாழி, தினமணி கதிர், அரங்கேற்றம், தினப்புரட்சி, நான்காவது பரிமாணம் (கனடா), சதங்கை, இந்தாம் (மின்னிதழ்), மின்னம்பலம் (இணைய இதழ்) போன்று பல்வேறு தளங்களில் எழுதியுள்ளார்.

சென்னை சாகித்ய அகாடமியில் கதை, வாசிப்பு மற்றும் தமிழில் நவீன சிறுகதைகள் தொகுப்பில் கதை இடம் பெற்றுள்ளது. புது டெல்லி மற்றும் சாகித்ய அகாடமியின் இதழில் ஆங்கிலத்தில் மொழி பெயர்க்கப்பட்டுள்ளது. கேரள ஜனநாயகம் மாத இதழில் மலையாளத்திலும் மொழி பெயர்க்கப்பட்டுள்ளது. இவரின் சிறுகதைகளில் ஆறு இளம் முனைவர் (M. Phil.,) பட்டத்திற்க்கும், ஒருவர் முனைவர் (Ph.D.,) ஆய்வும் மேற்கொண்டு முடித்துள்ளனர். சென்னையிலுள்ள 'தலித் முரசு' பத்திரிக்கையில் இணை ஆசிரியராகவும் உள்ளார்.

இவரைப் பற்றி பழ மலாய் அவர்கள் எழுதி உள்ள குறிப்பு:

விழுப்புரத்தில், அடிநிலை மக்களிடையில் பிறந்து வளர்ந்து வாழ்ந்து வருபவர், அவர் களிடமிருந்து அந்நியமாகி வெறும் போலி யாகிப் போகாமல், தங்கள் இருப்பை, மன சாட்சிக்குத் துரோகம் செய்யாமல், எண்ணி எண்ணிப் பார்க்கிறார். அவர்களோடு சேர்ந்து போராடுகிறார். இந்த நிகழ்வுப் போக்கில் தான், இவர், நாட்டுப்புறப் பாடல்களைத் தொகுக்கிறார், வீதி நாடகங்களில் நடிக்கிறார், செய்திக் கட்டுரைகள் எழுதுகிறார், கவிதை, கதை, நாவல் - என்று வரைகிறார்.

அனுபவ மண்ணில் வேர்பாய்ச்சி, அழகி யல் வானில் கிளை பரப்புவதாலேயே இதய வேந்தனுடைய எழுத்துக்களை நாங்கள் இலக்கியம் என்று ஏற்றுக் கொள்கிறோம்.

- பேராசிரியர் பழ மலாய்

Rent Now
Write A Review

Same Author Books