Home / eBooks / Indiya Dhesiya Poongakkal
Indiya Dhesiya Poongakkal eBook Online

Indiya Dhesiya Poongakkal (இந்திய தேசியப் பூங்காக்கள்)

About Indiya Dhesiya Poongakkal :

“இந்திய தேசியப் பூங்காக்கள்” என்ற இந்நூல், இந்தியாவில் அரசால் அறிவிக்கப்பட்டு, பராமரிக்கப்பட்டு வருகிற தேசியப் பூங்காக்களைப் பட்டியலிட்டு ஒவ்வொரு பூங்காவின் அமைவிடம், பார்வையாளர்கள் செல்வதற்கான அருகில் உள்ள தொடர்வண்டி நிலையங்கள், விமான நிலையங்கள் ஆகிய குறிப்புகளையும், பூங்காவைப் பார்ப்பதற்கான சிறந்த காலம், அப்பகுதிகளில் பேசப்படும் மொழிகள் ஆகியவற்றையும் குறிப்பிட்டு இந்நூலை ஒரு சிறந்த வழிகாட்டி நூலாக வடிவமைத்துள்ளார். ஒவ்வொரு பூங்காவினுடைய சிறப்பியல்புகள், அங்குள்ள தாவர வகைகள், பறவைகள், விலங்கினங்கள் ஆகிய குறிப்புகளையும் தந்துள்ளார். இயற்கை ஆர்வலர்களுக்கும், சுற்றுச் சூழல் ஆர்வலர்களுக்கும், சுற்றுலா ஆர்வலர்களுக்கும் இந்நூல் சிறந்த தகவல் களஞ்சியமாகவும், கையேடாகவும் அமையும் என்பதில் ஐயமில்லை. வன விலங்குகளையும் இயற்கை வளங்களையும் பாதுகாப்பதிலும், அவை குறித்த விழிப்புணர்வினைப் பொதுமக்களிடமும், குறிப்பாக இளைய தலைமுறையினரிடமும் பரப்புவதில் இந்நூல் சிறந்த பங்காற்றும்.

About Theni M. Subramani :

தேனியில் சுயநிதிப் பொறியியல் கல்லூரி ஒன்றில் நிருவாக மேலாளர் மற்றும் செயலாளர் (கூடுதல் பொறுப்பு) நிலையில் பணியாற்றிய தேனி மு. சுப்பிரமணி, கல்லூரி நிருவாகத்துடன் ஏற்பட்ட கருத்து வேறுபாட்டால் அங்கிருந்து வெளியேறிய பின்பு, தமிழில் வெளியாகும் பல்வேறு இதழ்களில் எழுதி வருகிறார். ஆன்மிகம், கணினி, இணையம், கல்வி உள்ளிட்ட பல்வேறு துறைகளில் ஆயிரத்து ஐநூறுக்கும் அதிகமான கட்டுரைகளை எழுதியிருக்கிறார். இதுவரை இவர் எழுதிய பதின்மூன்று நூல்கள் வெளியாகியிருக்கின்றன. இவர் எழுதிய ‘தமிழ் விக்கிப்பீடியா’ எனும் நூலுக்குத் தமிழ்நாடு அரசின் தமிழ் வளர்ச்சித் துறையின் சிறந்த நூலுக்கான பரிசு கிடைத்திருக்கிறது என்பது இங்கு குறிப்பிடத்தக்கது. தமிழ்நாடு அரசின் தமிழ் வளர்ச்சித்துறையினால் நடத்தப்பெற்று வரும் இளந்தமிழர் இலக்கியப் பட்டறை, ஆட்சி மொழிப் பயிலரங்கம், கருத்தரங்கம் உள்ளிட்ட நிகழ்வுகளிலும், தமிழ்நாட்டிலுள்ள பல்வேறு கல்லூரிகளில் நடத்தப்பெறும் பயிலரங்கம் மற்றும் கருத்தரங்கம் உள்ளிட்ட நிகழ்வுகளிலும் கலந்து கொண்டு ‘இணையத்தமிழ்’ தொடர்பாகப் பல்வேறு பயிற்சி வகுப்புகளை நடத்தி வருகிறார்.

தேனித் தமிழ்ச் சங்கத்தின் தலைவராகவும், சென்னை, சங்கம் தமிழ் அறக்கட்டளையின் செயலாளராகவும் செயல்பட்டு வரும் இவர், 2006 ஆம் ஆண்டில் முத்துக்கமலம் (www.muthukamalam.com) எனும் பெயரில் பன்னாட்டுத் தமிழ் மின்னிதழ் (ISSN: 2454 - 1990) ஒன்றினைத் தொடங்கி, அதன் ஆசிரியராகத் தொடர்ந்து செயல்பட்டு வருகிறார். மாதமிருமுறை புதுப்பிக்கப்பட்டு வரும் முத்துக்கமலம் இணைய இதழ் குறித்து ஆய்வு செய்து இருவர் எம்.பில் பட்டங்களைப் பெற்றிருக்கின்றனர். ‘முத்துக்கமலம் இணைய இதழின் இலக்கியப் பணிகள்’ எனும் தலைப்பில் ஒருவர் மதுரை காமராசர் பல்கலைக்கழகத்தில் முனைவர் பட்டத்திற்கான (Ph.D) ஆய்வு மேற்கொண்டு வருகிறார் என்பதும் இங்கு குறிப்பிடத்தக்கது. பல்கலைக்கழக மானியக் குழுவின் தமிழ் மொழிக்கான ஆய்விதழ்களின் பட்டியலில் முத்துக்கமலம் இதழ் ஒரு ஆண்டு காலம் இடம் பெற்றிருந்தது என்பதும் இங்கு கவனிக்கத்தக்கது.

Rent Now
Write A Review

Same Author Books