Home / eBooks / Malai Sarivil Oru Tea Kadai
Malai Sarivil Oru Tea Kadai eBook Online

Malai Sarivil Oru Tea Kadai (மலைச்சரிவில் ஒரு டீக்கடை)

About Malai Sarivil Oru Tea Kadai :

பத்மினி பட்டாபிராமன் எழுதி வெளியிட்டிருக்கும் இந்த சிறுகதைகள் தொகுதியில், மொத்தம் 24 சிறுகதைகள் உள்ளன.

பல கதைகளும், அமுதசுரபி, கல்கி,மங்கையர் மலர், விகடன், கலைமகள்,குமுதம் லேடீஸ் ஸ்பெஷல் போன்ற பல பத்திரிகைகளில் பரிசு பெற்றவை.

கலைமகள், கல்கி. லேடீஸ் ஸ்பெஷல் வெளியிடும் தீபாவளி மலர்களில் இடம் பெற்ற சிறப்பு சிறுகதைகள்.

அமுதசுரபியில் வெளியாகி, இலக்கிய சிந்தனையின் பரிசு பெற்றது “புது வெளிச்சம்” சிறுகதை சாவியில் வெளியாகி, எழுத்துலக ஜாம்பவான் திரு. சாவி அவர்களால் (கடிதம் மூலம்) பாராட்டப் பட்டது,”ஒருதரம் ஒரேதரம்” சிறுகதை.

எழுத்துலக பிதாமகர், அமரர் திரு. விக்கிரமன் அவர்கள் துவங்கிய “இலக்கியப் பீடம்” பத்திரிகையில் பரிசு பெற்றவை, “இதுவும் ஒரு தண்டனைதான்”, “அதுவாகி நின்று” கதைகள்.

“பயணம்” சிறுகதை, பூடான் நாட்டின் பின்னணியில், விபத்தில் இறந்த தன் மகனை அடையாளம் காணச் செல்லும் ஒரு வயதான தந்தையின் அனுபவங்களைப் பேசுகிறது. குமுதத்தில் வெளியாகி பெரும் பாராட்டுப் பெற்ற சிறுகதை.

ஏற்காட்டுக்கு விடுமுறைக்குச் செல்லும் ஒரு குடும்பத்தை, ஒரு குரங்குக் கூட்டம் துரத்துகிறது. ஏன்? அமரர் கல்கி நினவு சிறுகதைப் போட்டியில் பரிசு பெற்றது “இரு போராட்டம்” என்ற இந்தக் கதை..

“மதி மதிப்பு கதை” யும் கல்கி சிறுகதைப் போட்டியில் பரிசு பெற்ற மற்றோர் கதை.

சுந்தரம் ஃபைனான்ஸ் நடத்திய சிறுகதைப் போட்டியில் முதல் பரிசு பெற்ற சிறுகதை “ஒரு மயிலாப்பூர் ஏஜண்ட்.”

ஆனந்த விகடனில் வெளியானது “பணப்பந்து”

“ஷான் என்ற ஷண்முகநாதன்” குமுதம் இதழில் வெளியானது.

கடன் வாங்கி சுமாராய் ஒரு வீடு கட்டி, அதில், நாளை கிரகப் பிரவேசம் நடைபெற இருக்கும் போது அதன் வெள்ளை சுவரெங்கும் கண்ணீர் அஞ்சலி போஸ்டர்கள்..யார் ஒட்டினார்கள்?

கலைமகளில் வெளியான சுவரொட்டி சிறுகதையின் சாரம் இது.

கலைமகளில் வெளியான மற்ற கதைகள், “காணிக்கையான கடன்”, “நீதிக்கு அப்பால்” ஆகியவை.

சிரிக்க வைக்கும் கதைகளாக, “பானுமதியும் பாசுமதியும்’ வைத்து தரும் வைபோகமே”இவை லேடீஸ் ஸ்பெஷல், மங்கையர் மலர் பத்திரிகைகளில் வெளியானவை.

லேடீஸ் ஸ்பெஷல் 2013 தீபாவளி மலரில் வெளியானது புத்தகத் தலைப்பான, வால்பாறை பின்னணியில்

“மலைச் சரிவில் ஒரு டீக்கடை” அம்மா நடத்தும் டீக்கடையில் யாரோ தவற விட்ட பணப்பை, போக்கிரி மகன் கையில் கிடைக்கிறது.. அப்புறம்..?

வித்தியாசமான வாசிப்புக்கு ஏற்ற கதைகள் இந்த தொகுப்பில் உள்ளன..

About Padmini Pattabiraman :

பத்மினி பட்டாபிராமன் குறிப்புக்கள்

சென்னை தொலைக்காட்சியில் 14 வருடங்களுக்கு மேலாக நிகழ்ச்சி மற்றும் செய்தி அறிவிப்பாளராக ஏராளமான பேட்டிகள், நிகழ்ச்சித் தொகுப்புக்கள் வழங்கியிருக்கிறார். அகில இந்திய வானொலி எஃப். எம்மில் 2 வருடங்கள் செய்திகள் வாசித்திருக்கிறார். குமுதம், ஆனந்தவிகடன், கல்கி, அமுதசுரபி, குங்குமம், கலைமகள், மஞ்சரி, இலக்கியப் பீடம், லேடீஸ் ஸ்பெஷல், மங்கையர் மலர், பெண்மணி, சாவி, மங்கை, ராஜம், தாய், தமிழரசி போன்ற பல பத்திரிகைகளில் சிறுகதைகள், குறுநாவல்கள், கட்டுரைகள், தொடர்ந்து எழுதி வருகிறார்.

மஞ்சரி, ஆன்மீகம் இதழ்களில் இவர் எழுதிய பயணம் மற்றும் கோயில்கள் பற்றிய கட்டுரைகள் பிரசுரமாகி இருக்கின்றன.

கல்கியில் 16 பக்க இணைப்பு புத்தகத்தை இரண்டு முறைகள் தயாரித்திருக்கிறார். மங்கையர் மலரிலும் “இணைப்பு” புத்தகங்கள் எழுதி வருகிறார்.

அகில இந்திய வானொலியின் நாடக விழாக்களில் இவர் எழுதிய நாடகங்கள் தொடர்ந்து மூன்று ஆண்டுகள் ஒலிபரப்பாகியிருக்கின்றன.

இவரது எழுத்தில், பொதிகை தொலைக்காட்சியில், ஆர்.எம்.கே.வி நிறுவனம் வழங்கிய தொடர் “ரசிகப்ரியா” என்னும் ஒரு மணி நேர நிகழ்ச்சி. இரண்டு வருடங்கள் ஒளிபரப்பானது.

மங்கையர் மலரில் பல வருடங்களாக மருத்துவம், உடல் நலம்,தோட்டக் கலை, புகைப்படக் கலை பற்றிய தொடர் கட்டுரைகள், அறிவியல் கட்டுரைகள் எழுதி வருகிறார்.

அமுதசுரபி குறுநாவல் போட்டி, கல்கி குறுநாவல் போட்டி, சுந்தரம் ஃஃபைனான்ஸ், மைலாப்பூர் டைம்ஸ் இணந்து நடத்திய சிறுகதைப் போட்டிகளில் முதல் பரிசு, ஆனந்த விகடன் பொன்விழா கதைப் போட்டி, குமுதம் சிறுகதைப் போட்டி, கல்கி சிறுகதைப் போட்டி, இலக்கியபீடம் சிறுகதைப் போட்டி, தமிழரசி பத்திரிகையில் அமரர் எம்.ஜி.ஆர். நினைவு சிறுகதைப் போட்டி என பல போட்டிகளில் பரிசுகள் பெற்றுள்ளார்.

“மாமரத்து வீடுகள்” ,திருமதி சிவசங்கரி அவர்களாலும், “புது வெளிச்சம்” திரு. நல்லி குப்புசாமி அவர்களாலும் வெளியிடப்பட்டு பெரும் பாராட்டு பெற்றவை.

கம்ப்யூட்டர் அனிமேஷன் கிராஃபிக்ஸ்மற்றும் அறிவியல் கட்டுரைகளின் தொகுப்பான , “டிஜிட்டல் வாழ்க்கை” புத்தகத்தை, இயக்குனர் திரு.வசந்த் வெளியிட்டார்.

சென்னை அண்ணா பல்கலைக் கழகத்தில் வருகைப் பேராசிரியராக (VISITING FACULTY) 2002 ம் ஆண்டு முதல் கடந்த 14 வருடங்களுக்கு மேலாக கம்ப்யூட்டர் கிராஃபிக்ஸ், அனிமேஷன், வெப் டிசைனிங் கற்றுத்தந்தவர். அனிமேஷன் வகுப்புக்கள் எடுத்து வருகிறார்

இவரது கணவர் பட்டாபிராமன் அசோக் லேலண்ட் நிறுவனத்தில் ஏற்றுமதி பிரிவில் உயர் அதிகாரியாக பணி புரிந்துவிட்டு தற்சமயம் பேராசியராக இருக்கிறார்.

Rent Now
Write A Review

Same Author Books